मुगु असार ९ गते सोमबार मुगु जिल्लाको छायानाथ रारा गाउँपालिका–११ स्थित कुसा टाउ र लुम्सो गाउँ नजिकको क्षेत्रमा विद्युत् चुहावटका कारण १० खच्चरको ज्यान गएको छ।
गमगढीबाट सामान बोकेर कार्मारोङतर्फ जाँदै गरेका खच्चरहरू बाटोमै करेन्ट लागेर मरेका हुन्। मृत खच्चरमध्ये ४ वटा कर्णबहादुर मल्ल, ३ वटा जग्गी बढुवाल र अन्य ३ वटा पृथ्वीबहादुर ऐडीका थिए।
स्थानीयका अनुसार, नेपाल विद्युत् प्राधिकरणको गमगढी वितरण केन्द्रअन्तर्गत रहेको एक ट्रान्समिटरमा समस्या आएपछि जमिनमा करेन्ट चुहिएको थियो। पानी परिरहेको समयमा करेन्ट जमिनभर फैलिँदा खच्चरहरू एकैपटक मरेका हुन्।
छायानाथ–११ निवासी कन्नबहादुर मल्लका अनुसार ट्रान्समिटरको अर्थिङ प्रणाली कमजोर भएकाले पानीसँगै करेन्ट जमिनमा बगेको थियो। उनले भने, “एक्कासी करेन्ट फैलिँदा खच्चरहरू ढलेर मरे।”
यस्तै, केही दिनअघिमात्र वडा नं १२ कम्फागाउँका खड्कबहादुर बुढाको भैँसी पनि करेन्ट लागेर मरेको थियो।
एक खच्चरको बजार मूल्य १५ लाख रुपैयाँभन्दा बढी हुने अनुमान गरिएको छ, जसले किसानहरूलाई लाखौँको नोक्सानी भएको छ।
विद्युत् वितरण केन्द्र गमगढीका प्रमुख साजन ऐडीले वर्षा र हुरी–बतासका कारण ट्रान्समिटरमा समस्या आएको स्वीकार्दै, क्षतिपूर्तिका लागि सिफारिस गरिएको जानकारी दिएका छन्।
स्थानीय किसानले ट्रान्समिटरको क्षमता न्यून र सुरक्षात्मक प्रणाली कमजोर भएको भन्दै विद्युत् प्राधिकरणको लापरवाहीप्रति आक्रोश व्यक्त गरेका छन्।