अविरल वर्षापछि आएको पहिरोले कर्णाली राजमार्ग अवरुद्ध भएको छ। गएरातिदेखि निरन्तर परेको भारी वर्षापछि कालिकोटको गगने खोलामा खसेको ठूलो ढुंगा र माटो सहितको पहिरोका कारण राजमार्ग विहान ६ बजेदेखि ठप्प भएको हो।
सडक डिभिजन कार्यालय जुम्लाका प्रमुख दिपेन्द्र चौधरीका अनुसार पहिरो पन्छाउनका लागि ठूला मेसिन र प्राविधिक जनशक्ति खटाइएको छ।
बरसातको मौसम भएकाले यात्रा सुरक्षाका लागि पूर्व जानकारी लिएर मात्रै हिँड्न उनले आग्रह गरेका छन्। सडक अवरुद्ध हुँदा जुम्लाबाट सुर्खेत तथा नेपालगञ्जतर्फ जाने यात्रुबाहक र मालवाहक सवारीसाधन बाटोमै अलपत्र परेका छन्।