बुटवल, असार २५पूर्व–पश्चिम राजमार्ग अन्तर्गत नवलपरासी (पश्चिम) स्थित दाउन्नेको खुर्सानी खोलामा सडक भासिँदा बर्दघाट–दुम्किबास सडकखण्डमा यातायात पूर्ण रूपमा अवरुद्ध भएको छ
सोमबार रातिदेखिको वर्षापछि खोलानजिकको सडक भासिएर लु १ क ५८२७ नम्बरको ट्रक फसेपछि उक्त खण्डमा गाडी चल्न सकेका छैनन्।जिल्ला प्रहरी कार्यालय पश्चिम नवलपरासीका सूचना अधिकारी डीएसपी वीरदत्त पन्तका अनुसार, सडक अबरुद्ध भएपछि पूर्वतर्फ जाने सवारीसाधन बर्दघाटको टिसिएन चोकमा रोकिएका छन् भने पश्चिमबाट आएका गाडीहरू दुम्किबासमै थुनिएका छन्।”
सडक खुलाउने प्रयास भइरहेको छ, तर निरन्तरको वर्षाले काम गर्न गाह्रो भइरहेको छ,” डीएसपी पन्तले बताए। उनका अनुसार सडक सुचारु हुन अझ केही समय लाग्न सक्छ।खुर्सानी खोलाको यो क्षेत्र विगतमा पनि पटक–पटक सडक भासिएर अवरुद्ध हुने गरेको छ।
यता, नारायणगढ–बुटवल सडक विस्तार अन्तर्गत दाउन्ने खण्डको झण्डै १४ किलोमिटर सडकको काम अझै सम्पन्न नभएको कारण पनि यो क्षेत्रमा सधैं समस्या देखिँदै आएको हो।स्थानीयवासीहरू भन्छन्— “यो समस्या केवल सडक भासिनेमै सीमित छैन।
यहाँको पूर्वाधार निर्माण ढिलाइ, डिजाइनको कमजोरी र व्यवस्थापनको अभावका कारण यो भन्दा फरक अलि बढी समस्याहरू निम्तिएको छ। बारम्बारको सडक अवरुद्धले यात्रा मात्र होइन, व्यापार, आपतकालीन सेवा र जनजीवनमा समेत असर गरिरहेको छ।”