आगामी फागुन २१ गते हुने प्रतिनिधिसभा सदस्य निर्वाचनका लागि जुम्लामा एक स्वतन्त्रसहित १० जना उम्मेदवारले मनोनयन दर्ता गराएका छन्। जिल्ला अदालत जुम्लामा रहेको मुख्य निर्वाचन अधिकृतको कार्यालयमा मंगलबार दिनभर शान्तिपूर्ण रूपमा मनोनयन प्रक्रिया सम्पन्न भएको हो।
नेपाली कम्युनिस्ट पार्टी (नेकपा)का तर्फबाट नरेश भण्डारीले दिउँसो करिब साढे १ बजे मनोनयन दर्ता गराएका हुन्। सञ्चारकर्मीसँग कुरा गर्दै उनले यसपटक मतदाताले विवेकपूर्ण निर्णय गर्ने विश्वास व्यक्त गरे। “हामी स्पष्ट बहुमतका साथ विजयी हुन्छौं, प्रश्न केवल कति मतको अन्तरले भन्ने मात्र हो,” भण्डारीले दाबी गरे।
जुम्लालाई क्रान्तिकारी जिल्ला भन्दै उनले यहाँका जनताले भाषण होइन, काम गर्ने प्रतिनिधि खोजिरहेको बताए।
यसैगरी प्रगतिशील लोकतान्त्रिक पार्टी (प्रलोपा)का उम्मेदवार मनऋषि धितालले पनि जुम्लाबाट उम्मेदवारी दर्ता गराएका छन्। पूर्व माओवादी केन्द्रका केन्द्रीय सदस्यसमेत रहेका धिताल मंगलबार निर्वाचन अधिकृतको कार्यालयमा पुगेर मनोनयन दर्ता गराएका हुन्।
अध्यक्ष पुष्पकमल दाहाल ‘प्रचण्ड’को धार छोडेर जनार्दन शर्माको समूह रोजेका धिताल युद्धकालदेखि पत्रकारितामा सक्रिय रहँदै आएका भए पनि जुम्लामा भने नयाँ राजनीतिक अनुहारका रूपमा हेरिएका छन्। स्थानीय स्तरमा उनको राजनीतिक पहुँच कमजोर रहेको टिप्पणी पनि भइरहेको छ।
राष्ट्रिय स्वतन्त्र पार्टी (रास्वपा)बाट विनिता कठायतले प्रत्यक्षतर्फ उम्मेदवारी दर्ता गरेकी छन्। मनोनयनपछि प्रतिक्रिया दिँदै उनले कर्णालीको भूगोल, समस्या र नागरिकको पीडा बुझ्ने प्रतिनिधि संसदमा जानुपर्ने बताइन्। “जुम्लाका नागरिकको आवाज मैले निरन्तर उठाउँदै आएको छु,” कठायतले भनिन्।
उनी जुम्लाबाट प्रत्यक्ष निर्वाचनमा उम्मेदवारी दिने एकमात्र महिला उम्मेदवार हुन् र यसअघि रास्वपाबाट समानुपातिक सांसदसमेत भइसकेकी छन्।
नेपाली कांग्रेसका दीपबहादुर शाहीले साँझ करिब साढे ४ बजे बिना तामझाम मनोनयन दर्ता गराएका छन्। आफू भुइँमान्छेको प्रतिनिधि भएर चुनावमा होमिएको बताउँदै उनले बाल्यकालदेखि देख्दै आएका जिल्लाका दीर्घकालीन समस्या समाधानमा केन्द्रित हुने प्रतिबद्धता जनाए।
तर कांग्रेसभित्रको आन्तरिक गुटबन्दी शाहीका लागि चुनौतीका रूपमा देखिएको छ। उनी गगन थापानिकट समूहबाट टिकट पाएका हुन्। यसअघि जिल्ला समितिले सभापति कर्णबहादुर शाही र कान्तिका सेजुवालसहित अन्य नेताहरूको नाम सिफारिस गरेको थियो।
२०७९ सालको निर्वाचनमा देउवानिकट ललितजंग शाही पराजित हुँदा कांग्रेसका बागी उम्मेदवार देवेन्द्र शाही विजयी भएका थिए। हाल देवेन्द्र शाही गगन थापाको पक्षमा खुलेका छन्।
मुख्य निर्वाचन अधिकृतको कार्यालयका अनुसार नेकपा एमालेबाट जिल्ला अध्यक्ष शान्तिलाल महत र राष्ट्रिय प्रजातन्त्र पार्टी (राप्रपा)बाट ज्ञानबहादुर शाहीले पनि उम्मेदवारी दर्ता गराएका छन्।
२०७९ सालको निर्वाचनमा गठबन्धनका बाबजुद विजयी भएका ज्ञानबहादुर शाहीमाथि यसपटक पार्टी परिवर्तनको चर्चा र सुर्खेतबाट उम्मेदवारी दिने रणनीतिका हल्लाले स्वार्थकेन्द्रित राजनीति गरेको आरोप लागिरहेको छ। राप्रपाभित्र आन्तरिक विवाद बढेको र संगठन कमजोर बनेको विश्लेषण भइरहेको छ।
यसैगरी नेपाल मजदुर किसान पार्टीबाट बिर्खबहादुर रावत, नेपाल जनता पार्टीबाट रनिलविक्रम शाही र नेपाल कम्युनिस्ट पार्टीबाट बिर्खबहादुर शाहीले उम्मेदवारी दर्ता गराएका छन्। स्वतन्त्रतर्फ भक्तबहादुर रावल पनि चुनावी मैदानमा उत्रिएका छन्।
मुख्य निर्वाचन अधिकृत आनन्दराज पन्तका अनुसार जुम्लामा एक स्वतन्त्रसहित कुल १० जनाको मनोनयन दर्ता भएको हो। “सम्पूर्ण प्रक्रिया शान्तिपूर्ण र व्यवस्थित रूपमा सम्पन्न भएको छ,” उनले जानकारी दिए।