जुम्ला । नेपाली काँग्रेस जुम्लाले आगामी फागुन २१ गते हुने प्रतिनिधि सभा निर्वाचनका लागि दिप बहादुर शाहीलाई उम्मेदवारका रूपमा अघि सारेको छ । शाहीले जुम्लाबाट आफ्नो उम्मेदवारी दर्ता गराएका हुन् ।
काँग्रेस जुम्लाका पूर्व सभापति समेत रहेका शाही सरल र सादगी नेताका रूपमा परिचित छन् । २०७९ सालको निर्वाचनमा काँग्रेस र माओवादीबीच गठबन्धन हुँदा काँग्रेसले माओवादी उम्मेदवारलाई समर्थन गरेको थियो ।
तर यस पटक जुम्लामा सबै राजनीतिक दलहरू आ–आफ्नै उम्मेदवारसहित चुनावी प्रतिस्पर्धामा उत्रिएका छन् ।
उम्मेदवारी दर्तापछि सञ्चारकर्मीसँग कुरा गर्दै शाहीले जनतालाई ठूला र महत्वाकांक्षी योजना बाँड्ने भन्दा पनि जुम्ली जनताको वास्तविक समस्याको समाधानलाई प्राथमिकता दिने बताए ।
दुई कार्यकालसम्म गाउँ विकास समितिको अध्यक्षको जिम्मेवारी सम्हालिसकेका शाहीले जुम्लाका समस्या आफूले नजिकबाट बुझ्दै आएको उल्लेख गरे । उनले गाउँ–गाउँ पुगेर स्थानीय तहका तत्कालीन, मध्यकालीन र दीर्घकालीन समस्याहरू पहिचान गरी तिनै विषयलाई आफ्नो मुख्य चुनावी एजेन्डा बनाउने प्रतिबद्धता व्यक्त गरे ।