धन सिंह रावत जुम्ला।
जुम्लाको सिँजा गाउँपालिकाले आफ्ना स्थानीयवासीको सहज र प्रभावकारी स्वास्थ्य सेवा सुनिश्चित गर्न नयाँ एम्बुलेन्स खरिद गरेको छ। गाउँपालिका अध्यक्ष पूर्णप्रसाद धितालका अनुसार, नेपाल सरकारको पूर्ण राजस्व छुट सुविधाअन्तर्गत गाउँपालिकाको लगानीमा उक्त एम्बुलेन्स ल्याइएको हो।
नयाँ एम्बुलेन्सको कुल लागत ३२ लाख पुगे पनि राजस्व छुटका कारण ११ लाख रुपैयाँ बचत भएको छ। एम्बुलेन्सको वास्तविक मूल्य २१ लाख रुपैयाँ हो भने व्यवस्थापन र अन्य खर्चमा थप ३ लाख रुपैयाँ खर्च गरिएको छ।
अध्यक्ष धितालले बताउनुभयो, “अघिल्लो एम्बुलेन्स पटक–पटक बिग्रिन थालेपछि मर्मतमा धेरै खर्च हुन थाल्यो, जसले गर्दा नागरिकलाई समयमा सेवा दिन कठिन भयो। यसै कारण नयाँ एम्बुलेन्स टेण्डर प्रक्रियाबाट खरिद गरिएको हो।”
गाउँपालिकाले सुत्केरी र गर्भवती महिलालाई निःशुल्क सेवा दिने व्यवस्था गरेको छ भने अन्य नागरिकलाई न्यून शुल्कमा एम्बुलेन्स सेवा प्रदान गर्दै आएको जानकारी दिएको छ। पुरानो सवारीका कारण स्वास्थ्य सेवा पाउन अप्ठ्यारो परेका सिँजावासीहरूले अब सहज र भरपर्दो सेवा पाउने अपेक्षा गरिएको छ।v