दिपक विश्वकर्मा जुम्ला।
जुम्ला। तातोपानी गाउँपालिका–७ स्थित बारागाउँको जनजागृति माध्यमिक विद्यालयले ‘अक्षर सुधार कार्यक्रम’का नाममा प्रत्येक विद्यार्थीबाट रु २५० शुल्क उठाएको पाइएको छ। विद्यालयले बाह्य क्षेत्रबाट तीनजना प्रशिक्षक बोलाई १० दिन लामो अक्षर सुधार तथा क्षमता अभिवृद्धि तालिम सञ्चालन गरेको थियो। उक्त तालिमको खर्च ब्यहोर्न विद्यार्थीहरूबाट प्रतिव्यक्ति रु २५० सङ्कलन गरिएको विद्यालय प्रशासनले जनाएको छ।
हालैको संविधान २०७२ को धारा ३१ को उपधारा २ अनुसार प्रत्येक नागरिकलाई आधारभूत शिक्षा अनिवार्य तथा निःशुल्क हुने व्यवस्था छ। तर, उक्त कानुनी व्यवस्था विपरित विद्यालयले प्रत्यक्ष शुल्क उठाएको स्थानीय अभिभावकहरूको गुनासो छ।
शुल्क तिर्न नसक्ने वा नमानेका विद्यार्थीहरूलाई विद्यालयबाट ‘रेस्टिक्ट’ गर्ने चेतावनी दिइएको अभिभावकहरूले बताएका छन्। साथै छात्रवृत्तिबाट प्राप्त हुने रकम समेत ब्याजसहित असुल गर्ने धम्की विद्यालय प्रशासनबाट आएको उनीहरूको आरोप छ।
एक जना विद्यार्थी निरा रावत विद्यालय प्रशासनको दबाब सहन नसकी रुँदै आफ्ना अभिभावक कहाँ पुगेपछि विषय बाहिर आएको हो। उनका अभिभावकले विद्यालयमै पुगेर प्रधानाध्यापकसँग स्पष्टीकरण माग गरेका थिए।
प्रधानाध्यापक अमर रावतले भने, “विद्यार्थीहरूका लागि अक्षर सुधार गर्न शुल्क लिएको हो। तिर्ने भए तिर्नुस्, नत्र रेस्टिक्ट हुन्छन्,” भनेर खुलेरै अभिभावकहरूलाई धम्की दिएको अभिभावक शेरबहादुर रावतले जानकारी दिए।
यसरी, संविधानमा सुनिश्चित निःशुल्क शिक्षाको अधिकार व्यवहारमा कार्यान्वयन नहुँदा अभिभावक र विद्यार्थी दुवै मर्कामा परेका छन्। स्थानीय स्तरमा शिक्षाको पहुँचलाई सहज बनाउनका लागि पालिका र सरोकारवाला निकायहरूको गम्भीर ध्यानआवश्यक देखिन्छ। भनी स्थानीयहरूको गुनासो रहेको छ