जुम्ला जिल्लाका कनकासुन्दरी गाउँपालिका बाहेकका अन्य सातवटै स्थानीय तहहरूले आज आर्थिक वर्ष २०८२/८३ का लागि बजेट सार्वजनिक गर्ने तयारी गरेका छन्। विद्यमान कानूनी व्यवस्था अनुसार, असार १० गतेभित्र नीति तथा कार्यक्रम र असार मसान्तभित्र बजेट पारित गर्नुपर्ने बाध्यताका आधारमा पालिकाहरूले आज आफ्नो अनुमानित आय–व्यय विवरण सार्वजनिक गर्न लागेका हुन्।
कनकासुन्दरी गाउँपालिकाले भने अन्य पालिकाभन्दा एक दिन अघिनै, असार ९ गते नै ५० करोड नाघेको बजेट सार्वजनिक गरिसकेको छ। गाउँपालिकाले कुल ४९ करोड ७१ लाख ७३ हजार ९९६ रुपैयाँको बजेट ल्याएको हो।
बजेट विवरण अनुसार, संघीय सरकारबाट:
वित्तीय समानीकरण अनुदान अन्तर्गत १० करोड १ लाख,
सशर्त पूँजीगत अनुदान २ करोड ७० लाख,
सशर्त चालु अनुदान १६ करोड ३० लाख,
विशेष अनुदान १ करोड ७८ लाख,
राजस्व बाँडफाँडबाट ९ करोड १९ लाख ८४ हजार १३१ रुपैयाँ प्राप्त हुने उल्लेख छ।
प्रदेश सरकारबाट पनि:
समानीकरण अनुदानमार्फत १ करोड २५ लाख ४९ हजार,
सशर्त अनुदान २ करोड ३२ लाख ६९ हजार,
राजस्व बाँडफाँडबाट ७ लाख,
आन्तरिक स्रोततर्फ ४ करोड ६५ लाख र आन्तरिक राजस्व संकलन ३२ लाखको अनुमान गरिएको छ।
गैरसरकारी संस्थाहरूको सहयोगमा पनि गाउँपालिकाले बजेट ल्याएको छ। INF नेपाल जुम्लाबाट १७ लाख ८६ हजार ८६५ र क्याड नेपाल जुम्लाबाट ९२ लाख ८५ हजार रुपैयाँ प्राप्त हुने अनुमान गरिएको छ।
गाउँपालिकाका अनुसार, यो बजेट संघीय र प्रदेश सरकार, आन्तरिक स्रोत तथा गैरसरकारी संस्थाहरूको सहकार्यबाट संकलन हुने स्रोतमा आधारित छ।
बजेट कार्यान्वयन प्रक्रियाअनुसार, गाउँ वा नगरसभामा प्रस्तुत भएको बजेटमा १५ दिनभित्र छलफल गरी आवश्यक परिमार्जनका लागि कार्यपालिकामा पठाउन सकिनेछ। संशोधन आवश्यक भए कार्यपालिकाले ५ दिनभित्र पुनः सभामा पेश गर्नुपर्ने र असार मसान्तभित्र अन्तिम स्वीकृति पाउनुपर्ने प्रावधान छ।