राष्ट्रिय स्वतन्त्र पार्टी (रास्वपा) जुम्लाले पार्टी सभापति रवि लामिछानेमाथि भएको भनिएको राजनीतिक प्रतिशोधको विरोधमा सदरमुकाम खलंगामा हस्ताक्षर संकलन अभियान सञ्चालन गरेको छ।
जनस्तरमा व्यापक समर्थन र सहभागिता बटुल्दै गएको उक्त अभियान बिहान ११:३० बजे संघीय सांसद विनिता कठायतको हस्ताक्षरमार्फत औपचारिक रूपमा सुरू गरिएको हो।
सुरु भएको केही घण्टामै खलंगाको कृष्ण मन्दिर आसपासको क्षेत्रमा मात्र करिब २०० जनाले हस्ताक्षर गर्दै समर्थन जनाएका छन्। रास्वपा जुम्लाका सचिव जगतबहादुर खत्रीले दिएको जानकारीअनुसार, अभियानप्रति स्थानीय नागरिकको उत्साह उल्लेखनीय देखिएको छ।
देशभर र प्रवासमा एकसाथ सञ्चालन भइरहेको यो अभियानले न्याय, समानता र सत्ताको दुरुपयोगविरुद्ध जनचेतना फैलाउने र लोकतान्त्रिक मूल्य र मान्यताको रक्षा गर्ने उद्देश्य बोकेको रास्वपाले जनाएको छ।