भूकम्पपछि खानेपानीको गम्भीर अभाव झेलेका जाजरकोटका ग्रामीण बस्तीमा अहिले घरघरमै धारा जडान गरिएको छ। नलगाड नगरपालिका–४ अन्तर्गतका सार्कीवाडा, भात्चिउरा, फुलचाउली र प्यारगारा गाउँका करिब ४५ घरपरिवारले स्वच्छ खानेपानी सेवा पाएका छन्।
भूकम्पले मुख्य खानेपानी मुहान भासिएपछि यहाँका बासिन्दा पानीको चरम संकटमा परेका थिए। तर अहिले स्थानीय सरकार र आइएनएफ नेपालको साझेदारीमा घरआँगनमै धारा जडान भएपछि बासिन्दाले राहतको महसुस गरेका छन्।
सार्कीवाडाका १५, प्यारगाराका १५, भात्चिउराका १० र फुलचाउलीका ४ घरपरिवारको घरमै पाइपबाट पानी पुग्न थालेको हो। पहिले दैनिक दुई घण्टा पैदल हिँडेर पानी खोज्नुपर्ने बाध्यता थियो। कतिपयले त ढाराखोलाजस्ता टाढा र अपायक ठाउँमा पालो कुरेर पानी बोक्नुपर्थ्यो। अब भने धारा सिधै घरमै भएकोले डोकामा पानी बोक्ने झन्झट अन्त्य भएको छ।
छिपछिपे भात्चिउरा खानेपानी उपभोक्ता समितिका अध्यक्ष दिपा रावलका अनुसार, करिब १,२०० मिटर टाढा रहेको छिपछिपे मुहानबाट पाइपमार्फत पानी ल्याइएको हो। उनले यो योजना दीगो रूपमा सञ्चालन गर्न सामुदायिक सहभागितासहित व्यवस्थापन गरिने जानकारी दिइन्।
फुलचाउलीका केही घरपरिवारले त अघिसम्म १,५०० मिटर टाढाको मुलपानीबाट वा दुई घण्टा टाढाको डिमुरापानी गाग्रीमा बोकेर ल्याउनु पर्ने अवस्था थियो। चैतदेखि असारसम्म त स्थानीय मुहान नै सुक्ने भएकाले तलाउको पानी पिउनुपर्ने बाध्यता थियो। अहिले भने नियमित र स्वच्छ पानी घरमै पाउँदा बासिन्दा खुसी छन्।
यो खानेपानी योजनाले भूकम्पपछिको संकट टार्नुका साथै, विपन्न, दलित र दुर्गम बस्तीका समुदायको दैनिक जीवन सहज बनाएको छ।