धनसिंह रावत। जुम्ला।
जुम्ला अपाङ्गता भएका तथा अभिभावकविहीन बालबालिकाको शिक्षामा पहुँच सुनिश्चित गर्न जुम्लाको सिंजा गाउँपालिकामा आवासीय बालगृहको सञ्चालन सुरु गरिएको छ। आर्थिक अभावका कारण विद्यालय जानबाट बञ्चित बालबालिकालाई लक्षित गर्दै गाउँपालिकाको आर्थिक सहयोगमा बालगृह स्थापना गरिएको हो।
बालगृहको उद्देश्य बालबालिकालाई शिक्षा, आवास र स्याहारको भरपर्दो व्यवस्था उपलब्ध गराउनु हो। सिंजा गाउँपालिका–३ मा रहेको फुटासिल आधारभूत विद्यालयमा भर्ना भएका बालबालिकालाई अध्ययनका साथै बसोबासको सुविधा प्रदान गर्ने जिम्मेवारी स्थानीय संस्था ‘अपाङ्गता सशक्तिकरण केन्द्र’ लाई दिइएको छ।
गाउँपालिका अध्यक्ष पूर्ण प्रसाद धिताल र उपाध्यक्ष सितली रोकायाले संयुक्त रूपमा बालगृहको उद्घाटन गरेका हुन्। अध्यक्ष धितालका अनुसार सुरुआती चरणमा १५ जना विपन्न र अपाङ्गता भएका बालबालिकालाई आवासीय सेवा दिइएको छ। ती सबै बालबालिका अहिले नियमित रूपमा विद्यालयमा पढ्दैछन्।
उद्घाटन समारोहमा वडा नं. ३ का अध्यक्ष सुरथबहादुर रावतले बालगृहको व्यवस्थापनलाई गुणस्तरीय बनाउने प्रतिबद्धता जनाउँदै स्थानीय सरकार र वडाले आवश्यक सहयोग गर्ने बताए।
गाउँपालिकाको शिक्षा शाखा प्रमुख शंकर धितालले अध्ययनबाट बाहिर रहेका बालबालिकालाई विद्यालयतर्फ ल्याउन बालगृहले सकारात्मक भूमिका खेल्ने विश्वास व्यक्त गरे। उनले यस किसिमका कार्यक्रम सफल पार्न समुदाय, स्थानीय सरकार र सरोकारवाला निकायबीच सहकार्य आवश्यक रहेको उल्लेख गरे।
राष्ट्रिय अपाङ्ग महासंघ नेपालका केन्द्रीय सदस्य रामकृष्ण न्यौपानेले अपाङ्गता भएका बालबालिकालाई शिक्षा पहुँचमा ल्याउने कार्यमा बालगृहले महत्त्वपूर्ण योगदान पुर्याउने जनाउँदै गाउँपालिकाको प्रयासप्रति धन्यवाद ज्ञापन गरे।
यसअघि जुम्लाकै हिमा गाउँपालिकामा सञ्चालनमा ल्याइएको आवासीय विद्यालयमार्फत ५० भन्दा बढी बालबालिका आवासीय सेवा प्राप्त गर्दै अध्ययन गरिरहेका छन्। हाल स्थापना गरिएको सिंजा बालगृहबाट पनि शिक्षा र संरक्षणको क्षेत्रमा उल्लेखनीय योगदान हुने अपेक्षा गरिएको छ।