जुम्ला । जुम्लाको तातोपानी गाउँपालिकाले आर्थिक वर्ष २०८१/०८२ को खाताबन्दी कार्य सम्पन्न गर्दै समग्र खर्च विवरण सार्वजनिक गरेको छ। असार २५ गते देशभर भुक्तानी लेखाङ्कन कार्य बन्द भएसँगै गाउँपालिकाले सार्वजनिक रूपमा वित्तीय प्रगति विवरण प्रकाशित गरेको हो।
प्रमुख प्रशासकीय अधिकृत तिर्थ बहादुर कठायतका अनुसार, उक्त वर्षका लागि विनियोजित कुल ५३ करोड ७९ लाख ५ सय ९ रुपैयाँमध्ये ४३ करोड २० लाख ६८ हजार ८ सय ३१ रुपैयाँ खर्च भएको छ। बाँकी ९ करोड ८० लाख १० हजार ६ सय ७७ रुपैयाँ मौज्दात रहेको बताइएको छ।
चालु खर्चतर्फ, विनियोजित ३५ करोड ५७ लाख ६४ हजार ५ सय ९ रुपैयाँमध्ये ३० करोड १४ लाख ३ सय ३ रुपैयाँ खर्च भई ५ करोड ५७ लाख ५० हजार २ सय ५ रुपैयाँ मौज्दात रहेको छ। यसअनुसार चालु खर्चतर्फ ८४.३३ प्रतिशत बजेट खर्च भएको छ।
पुँजीगत खर्चतर्फ १७ करोड ४३ लाख १५ हजार रुपैयाँ विनियोजन गरिएकोमा १३ करोड २० लाख ५४ हजार ५ सय २८ रुपैयाँ खर्च भई ४ करोड २२ लाख ६० हजार ४ सय ७२ रुपैयाँ मौज्दात रहेको छ। पुँजीगत खर्चको प्रगति ७५.७६ प्रतिशत रहेको छ।
गाउँपालिका अध्यक्ष नन्द प्रसाद चौलागाईका अनुसार, निकासा भएको ५० करोड ४१ लाख ६४ हजार १ सय ८३ रुपैयाँ ९८ पैशामध्ये ४३ करोड २० लाख ६८ हजार ८ सय ३१ रुपैयाँ ३१ पैशा खर्च भएको छ, जसअनुसार कुल बजेट खर्च ८५.७० प्रतिशत पुगेको हो।
जुम्लाका आठ स्थानीय तहहरूमध्ये तातोपानी गाउँपालिका आर्थिक वर्ष २०८१/०८२ को खर्च विवरण सार्वजनिक गर्ने पहिलो स्थानीय तह बनेको छ। अन्य स्थानीय तहहरूले खाता बन्द गरे पनि अझैसम्म सार्वजनिक रूपमा खर्च विवरण प्रस्तुत गरेका छैनन्।