जुम्ला । सिंजा गाउँपालिकामा कार्यरत २४ जना करार कर्मचारीको आगामी आर्थिक वर्षदेखि सम्झौता नवीकरण नहुने भएको छ । तीमध्ये १६ जना शिक्षा क्षेत्रका शिक्षक र ८ जना स्वास्थ्यकर्मी रहेका छन् ।
गाउँपालिकाले सार्वजनिक सूचना जारी गर्दै आर्थिक वर्ष २०८२/०८३ को साउन १ गतेदेखि ती करार कर्मचारीहरूको सेवासम्बन्धी सम्झौता नगर्ने निर्णय गरेको हो । प्रमुख प्रशासकीय अधिकृत टेकबहादुर शाहीका अनुसार, कर्णाली प्रदेशको स्थानीय सेवा (गठन तथा सञ्चालन) ऐन, २०८१ को दफा १४ (१) तथा सोही ऐनअनुसार बनेको नियमावलीको नियम ११ को उपनियम (१) मा उल्लेख भएअनुसार, कुनै पनि पद नखुलेको वा सिर्जना नगरिएको अवस्थामा करार वा ज्यालादारीमा कर्मचारी नियुक्त गर्न नपाइने स्पष्ट व्यवस्था रहेको छ ।
शाहीले जानकारी दिएअनुसार, कानुनी प्रावधान विपरित गरिएको नियुक्तिबाट कर्मचारीले तलब, भत्ता तथा सेवा सुविधा लिएको पाइएमा त्यसको जिम्मेवारी नियुक्ति दिने पदाधिकारी वा अधिकारीलाई हुनेछ । साथै, नियुक्तिकर्ताबाट सेवा सुविधा असुल उपरसमेत गरिने व्यवस्था ऐनमा उल्लेख छ ।
हाल गाउँपालिका मातहतको स्वास्थ्य चौकी, आधारभूत स्वास्थ्य केन्द्र तथा विद्यालयहरूमा कार्यरत करार कर्मचारीहरूलाई “स्थानीय सरकार सञ्चालन ऐन, २०७४” को दफा ८३ (८) अनुसार तोकिएको पदमा मात्र हाजिरी गर्न सकिने जनाइएको छ । नयाँ आदेश वा व्यवस्था नभएसम्म २०८२ साउन १ गतेदेखि यथास्थितिमा कार्यालयमा हाजिर नगर्न तथा नगराउन निर्देशन दिइएको छ । यदि कसैले कानुनको उल्लंघन गर्दै कार्यालयमा हाजिर गरेमा वा गराएमा त्यसको सम्पूर्ण जिम्मेवारी सम्बन्धित व्यक्तिलाई नै हुने प्रमुख प्रशासकीय अधिकृत शाहीले बताएका छन् ।