धनसिंह रावत जुम्ला।
जुम्ला । नेपाल तरुण दल जुम्लाको नयाँ नेतृत्व चयनका लागि अब निर्वाचनमार्फत प्रक्रिया अघि बढ्ने भएको छ। प्रारम्भमा सहमतिको आधारमा नेतृत्व चयन गर्ने प्रयास गरिएको भए पनि आकांक्षी उम्मेदवारहरूबीच समझदारी कायम हुन नसकेपछि अन्ततः निर्वाचनको बाटो रोजिएको हो।
साउन ९ गते उद्घाटन भएको तरुण दलको पाँचौँ जिल्ला अधिवेशनमा अध्यक्षसहितका पदहरूमा धेरै आकांक्षी देखिएपछि सहमति जुटाउन तीन सदस्यीय संयोजन समिति गठन गरिएको थियो। तर, पटक–पटकको प्रयासपछि पनि सहमति हुन नसकेको भन्दै नेपाली कांग्रेस जुम्लाले निर्वाचन गर्ने निर्णय लिएको हो।
पार्टीका जिल्ला सचिव अर्जुनसिंह कठायतका अनुसार बिहीबार बसेको कांग्रेस पदाधिकारी बैठकले निर्वाचन मण्डललाई आवश्यक प्रक्रिया शीघ्र सुरु गर्न निर्देशन दिएको छ। उनले भने, “अब नेतृत्वको जिम्मा कसले लिने भन्ने निर्णय मतदाताले गर्नेछन्।”
झन्डै एक हप्ता सहमति जुटाउने प्रयास गरेपछि पनि निष्कर्ष ननिस्केपछि पार्टी निर्वाचनमा जान बाध्य भएको कांग्रेस स्रोतले जनाएको छ। अध्यक्षसहित अन्य पदमा उम्मेदवारी दिएका व्यक्तिहरूले समेत निर्वाचनलाई सकारात्मक रूपमा लिएको र लोकतान्त्रिक अभ्यासमा यो उदाहरणीय बन्ने विश्वास व्यक्त गरेका छन्।