जुम्ला नेपाली कांग्रेससम्बद्ध नेपाल तरुण दल जुम्लाको पाँचौँ जिल्ला अधिवेशनबाट हेम बहादुर बुढथापाको नेतृत्वमा नयाँ कार्यसमिति सर्वसम्मत रूपमा चयन गरिएको छ।
साउन ९ गते उद्घाटन भएको अधिवेशनको साउन १० गतेदेखि बन्द सत्र सुरु भएपनि नेतृत्व चयनमा सहमति जुट्न नसक्दा प्रक्रिया केही ढिलो भएको थियो। अन्ततः बिहीबार निर्वाचन अधिकृत भक्त बहादुर बुढाको संयोजनमा अध्यक्षसहित सबै पदमा सहमतिको आधारमा नयाँ कार्यसमिति चयन भएको हो।
निर्वाचित कार्यसमितिमा अध्यक्षमा हेम बहादुर बुढथापा चयन भएका छन्। उपाध्यक्ष पदमा रतन बहादुर शाही र माधव राज शर्मा चयन भएका छन् भने सचिवमा कृष्ण प्रसाद उपाध्याय, सह–सचिवमा कुमल बहादुर बाहोरा र कोषाध्यक्षमा डिल्ली प्रसाद उपाध्याय चयन भएका छन्।
समग्रमा ३१ सदस्यीय कार्यसमिति सर्वसम्मत निर्णयमार्फत गठन गरिएको निर्वाचन अधिकृत बुढाले जानकारी दिए। उनले निर्वाचन प्रक्रिया पूर्ण रूपमा पारदर्शी, लोकतान्त्रिक र सौहार्दपूर्ण भएको बताउँदै सम्पूर्ण प्रतिनिधि र उम्मेदवारप्रति आभार व्यक्त गरे।
नयाँ नेतृत्व चयनसँगै नेपाल तरुण दल जुम्लाले संगठनलाई थप सुदृढ गर्दै युवा लक्षित कार्यक्रमहरू सञ्चालन गर्ने बताइएको छ। अध्यक्ष बुढथापाले पार्टीको नीति, कार्यक्रम र संगठन विस्तारमा सक्रिय भएर काम गर्ने प्रतिबद्धता जनाए।
कांग्रेसको संगठन सुदृढीकरणको दृष्टिले समेत यो अधिवेशनलाई महत्वपूर्ण मानिएको छ।