हुम्लाको अदानचुली गाउँपालिका–३ मा अवस्थित छत्रपाल आधारभूत विद्यालयमा गए राति भीषण आगलागी भएको छ। राति करिब ८ बजे सुरु भएको आगलागीले विद्यालयको दुईतले दुई कोठे भवन पूर्णरूपमा जलेर नष्ट भएको छ। विद्यालयको मुलद्वारमा रहेको कार्यालय भवनसमेत आगोको लपेटामा परेका कारण २०५२ सालदेखि राखिएका सबै कागजात जलेर नष्ट भएका छन्।
शिक्षक नन्द फडेराका अनुसार, आगलागीले अफिस कोठामा रहेका सोलार सेट, ल्यापटप, कम्प्युटर, प्रिन्टर, सोफा, दराज, कुर्सी, डेस्क–बेन्च, वाद्यवादनका सामग्री (मादल, हार्मोनियम, ड्रमसेट, क्यासियो), बुक कर्नरका कागजात, कलाकारका लुगा, ट्रफी र करिब २५० वटा कचौरा लगायतका सबै सामग्री जलेका छन्। उनका अनुसार, केवल कार्यालय कोठामै करिब दुई करोड रुपैयाँभन्दा बढीको क्षति भएको अनुमान गरिएको छ।
विद्यालय वरिपरि बस्ती नभएकाले आगलागीको कारण स्पष्ट नभए पनि अज्ञात व्यक्तिबाट आगो लगाइएकाे हुन सक्ने विद्यालय प्रशासनले आशंका गरेको छ।