जुम्ला । गैरकानूनी जुवातासको लत फेरि जुम्ला सदरमुकाममा फैलिन थालेको छ। यही क्रममा प्रहरीले शुक्रबार राति चन्दननाथ नगरपालिका–१ मा चलिरहेको जुवाखालमा छापा मार्दै सात जनालाई पक्राउ गरेको छ।
जिल्ला प्रहरी कार्यालय जुम्लाका प्रहरी नायब उपरीक्षक (डीएसपी) रविन बाबु रेग्मीका अनुसार, गुप्त सूचनाका आधारमा गरिएको कारबाहीमा सात जना जुवाडे रंगेहात पक्राउ परेका हुन्। उनीहरूबाट नगद एक लाख उनान्सी हजार रुपैयाँभन्दा बढी बरामद गरिएको प्रहरीले जनाएको छ।
प्रहरीका अनुसार जुवातास खेल्ने समूह स्थानीय देसाङ तामाङको घरमा लामो समयदेखि गोप्य रूपमा सक्रिय थियो। प्रहरीको भनाइमा, “पक्राउ परेकाहरूले नजिकका बस्तीहरूबाट मानिसहरू बोलाएर नियमित रूपमा जुवा खेल्ने गरेका थिए।”
यस घटनापछि प्रहरीले जुम्ला बजार क्षेत्रमा निगरानी कडा बनाएको जनाएको छ। डीएसपी रेग्मीले भने, “जुवातास, सट्टेबाजी र अन्य अवैध गतिविधि पूर्ण रूपमा नियन्त्रण गर्न विशेष निगरानी अभियान अघि बढाइएको छ। कुनै पनि अपराधी उम्कन पाउने छैन।”
स्थानीय बासिन्दाहरूले भने यस्तो कारबाहीलाई प्रहरीको सकारात्मक कदमका रूपमा लिएका छन्। उनीहरूले लामो समयदेखि जुवा र मदिराजन्य गतिविधिले गाउँमा अशान्ति ल्याएको भन्दै कठोर कानूनी कदम चाल्न आग्रह गरेका छन्।