जुम्ला। आगामी फागुन २१ गते हुने प्रतिनिधिसभा सदस्य निर्वाचनको सुरक्षाका लागि जुम्लामा आवश्यकताभन्दा बढी निर्वाचन प्रहरी छनोट भएका छन्। जुम्लाका लागि ९७४ जनाको कोटा निर्धारण गरिएकोमा १४२७ जना उत्तीर्ण भएपछि ४५३ जनालाई वैकल्पिक (रिजर्भ) जनशक्तिका रूपमा राखिएको हो।
जिल्ला प्रहरी प्रमुख डिएसपी रबिनबाबु रेग्मीका अनुसार केन्द्रको निर्देशनअनुसार न्यूनतम उत्तीर्णांक हासिल गरेका सबै उम्मेदवारलाई वैकल्पिक सूचीमा समावेश गरिएको हो। उनका अनुसार जुम्लाको लागि आवश्यक जनशक्ति पूरा भइसकेको छ र आवश्यकता परे अन्य जिल्लामा समेत पठाउन सकिने गरी तयारी अवस्थामा राखिएको छ।
डिएसपी रेग्मीले कर्णाली प्रदेशका सबै १० जिल्लामा कोटाभन्दा बढी आवेदन परेकाले प्रदेशभित्र जनशक्ति अभाव नरहेको जानकारी दिए। तर गण्डकी र सुदूरपश्चिम प्रदेशका केही जिल्लामा भने आवश्यक संख्यामा निर्वाचन प्रहरी नपुगेको सूचनाअनुसार जुम्लाबाट समेत जनशक्ति पठाउन सकिने सम्भावना रहेको उनले बताए।
हाल वैकल्पिक सूचीमा रहेका ४५३ जनालाई केन्द्रबाट माग आएपछि रोलक्रमका आधारमा फोनमार्फत छनोट गरी खटाइने र यससम्बन्धी परिपत्र जारी भइसकेको प्रहरीले जनाएको छ।
जुम्लाका लागि ३८६ महिला र ६०६ पुरुष गरी कुल निर्वाचन प्रहरी छनोट भइसकेका छन्। साथै, निर्वाचन सुरक्षामा ९६ जना सशस्त्र प्रहरी पनि परिचालन गरिनेछ। निर्वाचन प्रहरीका लागि जम्मा १८९४ जनाले आवेदन दिएका थिए।
जिल्लाका लागि आवश्यक जनशक्तिलाई माघ १५ गते नियुक्ति दिई तालिममा सहभागी गराइने र माघ २५ गतेसम्म तालिम सम्पन्न गरी निर्वाचन सुरक्षामा परिचालन गर्ने तयारी गरिएको डिएसपी रेग्मीले बताए।
भौगोलिक रूपमा विकट मानिने जुम्लामा यसपटक निर्वाचन सुरक्षाका लागि पर्याप्तभन्दा बढी जनशक्ति उपलब्ध हुनु शान्तिपूर्ण र व्यवस्थित निर्वाचन सम्पन्न गर्न सहयोगी हुने अपेक्षा गरिएको छ।