आकाश सुनार जुम्ला।
जुम्ला — शिखर इन्स्योरेन्सले स्याउ बिमा अन्तर्गतको भुक्तानी समयमै नदिएको भन्दै जुम्लाका हजारौं किसान आन्दोलनमा उत्रिएका छन्। किसानहरूले गत वर्ष बिमा गरेका स्याउमा खडेरी र असिनाले व्यापक क्षति गरे पनि क्षतिपूर्ति रकम नपाएको गुनासो गरेका छन्।
शुक्रबार किसानहरूले जिल्ला प्रशासन कार्यालय जुम्लामार्फत प्रधानमन्त्री कार्यालयमा ज्ञापनपत्र बुझाउँदै आर्थिक वर्ष समाप्त हुन लाग्दा समेत बिमा रकम नआएकाले सडकमा उत्रिन बाध्य भएको जनाएका छन्।
स्याउ बिमा पहल समिति संयोजक खड्कबहादुर सेजवालले बिमा गरिएको स्याउमा खडेरी र असिनाका कारण ठूलो नोक्सानी पुगेको भन्दै बिमा रकम तत्काल उपलब्ध गराउनुपर्ने माग गरे।
किसानहरूले खलंगाको बालमन्दिर क्षेत्रबाट प्रशासन कार्यालयसम्म जुलुससहित नाराबाजी गरेका थिए। “स्याउ बिमाको रकम तुरुन्त दिनु”, “किसानको अपमान सहिँदैनौं”, “जुम्ली किसान एक हौं” भन्ने नारासहित प्रदर्शन गरिएको थियो।
सेजवालका अनुसार बिमा कम्पनीले पटक–पटक आग्रह गर्दा पनि रकम नदिएकाले अब आन्दोलन बाहेक अर्को विकल्प नरहेको बताए। “गत वर्ष स्याउ नफलेको र फलेको पनि असिनाले झारिदिएको अवस्था थियो, यस्तो अवस्थामा बिमा रकम दिनु त सरकारको दायित्व हो,” उनले भने।
किसानहरू बिमा प्रणालीप्रति पहिले उत्साहित थिए तर अहिले निराश भएको उनले बताए। बिमा भुक्तानी सुनिश्चित गर्न किसानहरूले एकजुट भई ‘किसान सञ्जाल’ पनि गठन गरेका छन्, जसले आगामी दिनमा कृषि र बिमा सम्बन्धी संस्थाको निगरानी गर्ने बताइएको छ।
यता शिखर इन्स्योरेन्सले भने किसानहरूले गलत मनसायले बोट संख्या बढाएर बिमा गराएको आरोप लगाउँदै भुक्तानी रोकिएको जनाएको छ। कम्पनीका अनुसार आर्थिक वर्ष २०८०/८१ मा कुल ७,५७४ कृषकमध्ये ६,६१३ को बगैंचामा निरीक्षण गर्दा औसत २५ प्रतिशतले बढी बोट देखाइएको थियो। अझै ९९४ कृषकका विवरण एकीन हुन बाँकी रहेको पनि कम्पनीले जनाएको छ।
