नेपाल तरुण दल जुम्लाको नयाँ जिल्ला नेतृत्व चयनका लागि निर्वाचन हुन लागेपछि जुम्लाको युवा राजनीतिमा सरगर्मी बढेको छ। पाँचौँ जिल्ला अधिवेशनअन्तर्गत अध्यक्ष पदमा आधा दर्जन युवाले उम्मेदवारी दिएपछि प्रतिस्पर्धा चुलिएको छ।
निर्वाचन समितिका संयोजक भक्त बुढाका अनुसार अध्यक्ष पदका लागि सिंजा क्षेत्रबाट तीन र खलंगा क्षेत्रबाट तीन गरी कुल छ जना उम्मेदवार प्रतिस्पर्धामा छन्।
सिंजा क्षेत्रका तीन उम्मेदवार:
सिंजा क्षेत्रबाट उम्मेदवारी दिएका सञ्जीव रावल, रतन शाही र भरत शाही सबैजना विद्यार्थी राजनीतिबाट हुँदै तरुण दलको सक्रिय भूमिकामा पुगेका हुन्।
सञ्जीव रावल काठमाडौंको शंकरदेव क्याम्पसमा नेविसंघ इकाई सदस्य हुँदै केन्द्रीय तहसम्म पुगेका नेता हुन्। संगठनप्रति निष्ठा राख्ने रावल अहिले तरुण दलमा क्रियाशील छन्।
रतन शाही हिमा गाउँपालिका–१ का वर्तमान वडा अध्यक्ष हुन्। उनी विद्यार्थी कालदेखि नै कांग्रेस राजनीतिमा संगठित ढंगले सक्रिय रहँदै आएका छन्। उनको नेतृत्वदक्षता र संगठन निर्माणमा विशेष पहिचान रहेको छ।
भरत शाही पनि विद्यार्थी राजनीतिबाट हुर्किएर तरुण दलमा सकृय रहेका युवा नेता हुन्। उनी युवामाझ लोकप्रिय छन् र पार्टीको सिद्धान्तप्रति प्रतिबद्धताका साथ अघि बढिरहेका छन्।
खलंगा क्षेत्रका तीन उम्मेदवार:
खलंगा क्षेत्रबाट भने हेम बुढथापा, राजेन्द्र श्रेष्ठ र विरेन्द्र शाही प्रतिस्पर्धामा छन्।
हेम बुढथापा चन्दननाथ नगरपालिका–२ का वडा अध्यक्ष हुन्। कम्युनिस्ट प्रभाव रहेको क्षेत्रमा कांग्रेसको विजय दिलाएका बुढथापा विद्यार्थी राजनीतिबाट हुर्किएका र निर्णयमा दृढता देखाउने नेताका रूपमा चिनिन्छन्।
राजेन्द्र श्रेष्ठ चन्दननाथ–५ निवासी श्रेष्ठ विद्यार्थी राजनीतिबाट उदाएका नेता हुन्। निरन्तर पार्टी सक्रियतामा लागिरहेका उनले यो अधिवेशनमा युवा नेतृत्वको दाबी प्रस्तुत गरेका छन्।
विरेन्द्र शाही तातोपानी गाउँपालिका निवासी शाही सामाजिक गतिविधिमा समेत सक्रिय छन्। युवाको हकहितका सवालमा लामो समयदेखि आवाज उठाउँदै आएका उनी युवामाझ लोकप्रिय व्यक्तित्व मानिन्छन्।
छ जना उम्मेदवार मैदानमा उत्रिएपछि कांग्रेस र यसको भ्रातृ संगठनभित्र युवा नेतृत्वको प्रतिस्पर्धा निकै रोचक बनेको छ। उम्मेदवारहरू आ–आफ्नो पक्षमा जनमत बटुल्न जुटिरहेका छन् भने कार्यकर्ताबीच लोकतान्त्रिक प्रक्रियाले सकारात्मक ऊर्जा थपेको छ।
अब निर्वाचनबाट को नेता बन्ने भन्ने प्रश्नले तरुण दल मात्रै होइन, सिंगो कांग्रेस युवा अभियानलाई नै चासोको केन्द्र बनाएको छ।
