धनसिंह रावत
जुम्ला । कर्णाली स्वास्थ्य विज्ञान प्रतिष्ठान, जुम्लामा डाक्टर नहुँदा भिडियो एक्सरे सेवा दुई सातादेखि अवरुद्ध भएको छ । रेडियोलोजी विशेषज्ञ चिकित्सक सम्पर्कविहीन भएपछि सेवा ठप्प हुँदा उपचारका लागि आउने बिरामीहरू मारमा परेका छन् ।
प्रतिष्ठानका निमित्त उपकुलपति डा. डब्ब बहादुर धामीका अनुसार सेवा जिम्मेवारीमा रहेका डाक्टर बिना कुनै जानकारी अनुपस्थित छन् । “हामी नयाँ रेडियोलोजी चिकित्सकको खोजीमा छौं”, उनले बताए, “अहिले कार्यरत डाक्टर सम्पर्कमा छैनन् ।”
अत्यावश्यक अवस्थाका केही बिरामीलाई भने सीमित रूपमा भिडियो एक्सरे सेवा दिइएको प्रतिष्ठानले जनाएको छ । यद्यपि, अधिकांश बिरामी सेवा नपाएर हैरान छन् ।
गुठिचौर–५, देपालगाउँका नन्दराम नेपालीले छोराको पेट दुखेपछि परीक्षण गर्न जाँदा भिडियो एक्सरे नभएकाले समस्या पत्ता लगाउन सकिएको छैन भन्ने गुनासो गरे । उनले भने, “प्रतिष्ठानमा एक्सरे सेवा छैन भनेर फर्काइयो, उपचार अपूरो भयो ।”
प्रतिष्ठानमा हरेक दिन दर्जनौँ बिरामी पुग्छन्, जसमा हड्डी तथा आन्तरिक समस्याका लागि भिडियो एक्सरे अनिवार्य मानिन्छ । तर, सेवा अवरुद्ध हुँदा बिरामीहरू अन्योलमा परेका छन् ।
