मुगु — मुगु जिल्लाको नाग्मा–गमगढी सडकखण्डमा नेपाली सेनाको बोलेरो जिप दुर्घटना हुँदा एक जना अमल्दारको मृत्यु भएको छ। छायाँनाथ रारा नगरपालिका–७ स्थित आलाधुने खोलाको मोडमा आइतबार राति करिब १०ः२० बजे दुर्घटना भएको हो।
रारा राष्ट्रिय निकुञ्जको सुरक्षामा खटिएको श्री हनुमानध्वज गुल्मको सल्लेरी पोस्टबाट कनकासुन्दरी गाउँपालिका–१ बुलबुलेस्थित पोस्टमा बन्दोबस्ती सामग्री पुर्याएर फर्कने क्रममा नेपाली सेनाको ना १ झ १०३९ नम्बरको बोलेरो जिप दुर्घटनामा परेको जिल्ला प्रहरी कार्यालय मुगुले जनाएको छ।
दुर्घटनामा बैतडी जिल्लाको पाटन नगरपालिका–४ बगाडी स्थायी घर भई हाल हनुमानध्वज गुल्म रारामा कार्यरत अमल्दार हरि सिंह ऐरी गम्भीर घाइते भएका थिए। उनलाई तत्काल उद्धार गरी जिल्ला अस्पताल मुगु पुर्याइएको भए पनि उपचारका क्रममा राति २ः१० बजे चिकित्सकले मृत घोषणा गरेको जिल्ला प्रहरी कार्यालय मुगुका प्रहरी नायब उपरीक्षक रविराज थपलियाले जानकारी दिनुभयो।
घटनाको जानकारी पाउनासाथ पिना प्रहरी चौकीबाट प्रहरी नायब निरीक्षक धनबहादुर कार्कीको नेतृत्वमा ६ जनाको प्रहरी टोली घटनास्थलमा खटिएको थियो। साथै, नेपाली सेनाको हनुमानध्वज गुल्मबाट सेनानी ऋषिराम न्यौपानेको कमाण्डमा ११ जना र सशस्त्र प्रहरी बल नं. ४५ गुल्मबाट सशस्त्र प्रहरी सहायक निरीक्षक दोलख शाहीको नेतृत्वमा १० जनासहित जम्मा २७ जनाको उद्धार टोली परिचालन गरिएको थियो।
उद्धार टोलीले चालक अमल्दार ऐरीलाई अचेत अवस्थामा उद्धार गरी अस्पताल पुर्याए पनि उनको ज्यान जोगाउन नसकिएको प्रहरीले जनाएको छ। मृतक अमल्दार ऐरीको जिल्ला अस्पताल मुगुमा पोस्टमार्टम सम्पन्न गरी नेपाली सेनाको हेलिकोप्टरमार्फत अन्त्येष्टिका लागि उनको जन्मथलो बैतडी जिल्ला पाटन नगरपालिका–४ बगाडी पठाइएको जिल्ला प्रहरी कार्यालयले जनाएको छ।
