मुगुको रमणीय रारातालको काखमा आयोजित पाँचौँ रारा ट्रेल रनले कर्णालीको खेल पर्यटन र प्राकृतिक सौन्दर्यलाई विश्वमाझ चिनाउने अवसर प्रदान गरेको छ। नेपाली सेनाको आयोजनामा शुक्रबार सम्पन्न यो प्रतियोगितामा जुम्लाका युवक राज बुढा र सुनमाया बुढाले शानदार प्रदर्शन गर्दै पुरुष र महिला विधाको उपाधि जितेका छन्।
जुम्लाको कनकासुन्दरी गाउँपालिका–३, लुम गाउँका युवक राज बुढाले पुरुषतर्फ १७४ प्रतिस्पर्धीलाई पछाडि पार्दै १६ किलोमिटरको दूरी केवल १ घण्टा १२ मिनेट १८ सेकेन्डमा पूरा गरी प्रथम स्थान हासिल गरे। त्यस्तै, महिलातर्फ जुम्ला पातारासी गाउँपालिका–२ की सुनमाया बुढाले ३७ धाविकालाई उछिन्दै १ घण्टा २४ मिनेट १८ सेकेन्डमा दौड पूरा गरी उपाधि चुमिन्।
पुरुषतर्फ कनकासुन्दरी–१ का सोमबहादुर रावतले १ घण्टा १४ मिनेट १९ सेकेन्डमा दोस्रो र कनकासुन्दरी–२ का चन्द्र रावतले १ घण्टा १४ मिनेट ४४ सेकेन्डमा तेस्रो स्थान प्राप्त गरे। महिलातर्फ पातारासी–२ की कल्पना बुढाले १ घण्टा २५ मिनेट ३५ सेकेन्डमा दोस्रो र गुठीचौर–३ की राज्यलक्ष्मी रावलले १ घण्टा २५ मिनेट ४६ सेकेन्डमा तेस्रो स्थान हासिल गरिन्।
नेपाली सेनाको हनुमानध्वज गुल्मद्वारा आयोजित यो प्रतियोगितामा २२३ धावकले सहभागिता जनाएका थिए, जसमा पुरुषतर्फ १७५ र महिलातर्फ ३८ जना थिए। विगत पाँच वर्षदेखि रारातालको सौन्दर्य र कर्णालीको सम्भावनालाई उजागर गर्न आयोजना हुँदै आएको यो ट्रेल रनले खेल पर्यटनको प्रवर्द्धनमा महत्वपूर्ण योगदान पुर्याएको छ।
गुल्मपति खिमबहादुर अधिकारीले भने, “रारा ट्रेल रनले कर्णालीको प्राकृतिक सुन्दरता र खेल पर्यटनको सम्भावनालाई विश्वमाझ पुर्याइरहेको छ। यो आयोजनाले स्थानीय खेलाडी उत्पादनमा पनि सहयोग पुर्याउँछ।”
प्रतियोगितामा प्रथम, द्वितीय र तृतीय हुने खेलाडीहरूलाई क्रमशः ५० हजार, ३० हजार र २० हजार रुपियाँ नगदसहित प्रमाणपत्र र ट्रफी प्रदान गरियो। पुरस्कार वितरण समारोहमा मुगुका प्रमुख जिल्ला अधिकारी कमल प्रसाद पाण्डे, नेपाली सेना उत्तर पश्चिम पृथनाका उपरथी अनुपजंग थापा, सहायक रथी सन्जय देउजा र गुल्मपति खिमबहादुर अधिकारीले विजेताहरूलाई सम्मान गरे।
रारा ट्रेल रनले रारातालको प्राकृतिक सौन्दर्यलाई मात्र नभई कर्णाली प्रदेशको खेल पर्यटनको सम्भावनालाई पनि उजागर गरेको छ। जुम्लाका खेलाडीहरूको वर्चस्वले स्थानीय प्रतिभालाई प्रोत्साहन गर्नुका साथै कर्णालीलाई खेल र पर्यटनको गन्तव्यका रूपमा स्थापित गर्न थप बल पुर्याएको छ।
