जुम्ला । जुम्लाका अटो व्यवसायीहरुले आफ्नो माग सम्बोधन हुनुपर्ने भन्दै आन्दोलन सुरु गरेका छन् । जिल्लाभर अटो सञ्चालन गर्न पाउनुपर्ने माग राख्दै उनीहरु सडक आन्दोलनमा उत्रिएका हुन् । आन्दोलनका क्रममा जिल्ला प्रशासन कार्यालय जुम्ला अगाडि अटोहरू पार्क गरी विरोध प्रदर्शन गरिएको छ ।
अटो व्यवसायीहरुको भनाइ अनुसार जुम्लाको बजार क्षेत्र सानो भएकाले सीमित क्षेत्रमा मात्रै अटो चलाउन दिँदा दैनिक जीविकोपार्जन गर्न कठिन भएको छ । त्यसैले तातोपानी गाउँपालिकादेखि चन्दननाथ नगरपालिकाको बजार क्षेत्रसम्म अटो सञ्चालन गर्न अनुमति दिनुपर्ने उनीहरुको माग छ ।
भैरवनाथ यातायात सेवा प्रालि जुम्लाका इन्चार्ज राजबहादुर रोकायाका अनुसार हाल तातोपानीदेखि चन्दननाथ नगरपालिकाको सीमित बजार क्षेत्रमा मात्रै अटो सञ्चालन गर्न दिइएको छ । यसले गर्दा अटो व्यवसायीहरुले आफ्नो दैनिक खर्चसमेत धान्न नसकेको अवस्था सिर्जना भएको उहाँले बताउनुभयो ।
उहाँका अनुसार भैरवनाथ यातायात सेवा प्रालिसँग १ सय १६ वटा अटो दर्ता छन् भने जुम्ला जिल्लाभर झण्डै २ सय २० वटा अटो सञ्चालनमा रहेका छन् । अटो चलाउन पाउने क्षेत्र विस्तार भए मात्र आफूहरुको जीविकोपार्जन सम्भव हुने रोकायाको भनाइ छ ।
यसैबीच अटो व्यवसायीहरुले तातोपानी गाउँपालिका–२ जर्मी नजिकैको राजमार्गमा अटो तेर्साएर सडक अवरुद्ध गरेका छन् । माग पूरा नभएसम्म अनिश्चितकालीन रूपमा राजमार्ग बन्द गर्ने चेतावनीसमेत उनीहरुले दिएका छन् । राज्यले गरिब नागरिकलाई काम गरेर खानसमेत नदिएको आरोप लगाउँदै रोकायाले सम्बन्धित निकायसँग तत्काल माग सम्बोधन गर्न आग्रह गर्नुभयो ।
यता प्रमुख जिल्ला अधिकारी दिपक पौडेलले अटो व्यवसायीहरुले जिल्लाभर अटो सञ्चालन गर्न पाउनुपर्ने माग राखेको जानकारी दिनुभयो । तर हालको कानुनी व्यवस्थाअनुसार जिल्लाभर अटो सञ्चालन गर्न दिने प्रावधान नरहेको उहाँले स्पष्ट पार्नुभयो । कानुनअनुसार अटोहरू पालिकाको सिमाना भित्र मात्रै सञ्चालन गर्न पाइने व्यवस्था रहेको उहाँको भनाइ छ ।
प्रशासन अटो व्यवसायीहरुको समस्याप्रति गम्भीर रहेको बताउँदै प्रमुख जिल्ला अधिकारी पौडेलले समस्या समाधानका लागि संवादको ढोका खुला राखिएको जानकारी दिनुभयो । अटो व्यवसायी, सम्बन्धित पालिका तथा सरोकारवाला निकायसँग छलफल गरी कानुनी सीमाभित्र रहेर सम्भावित विकल्प खोजिने उहाँले बताउनुभयो
